रुकुम पुर्व । रुकुम पूर्वको सिस्ने गाउँपालिकामा २०८१ सालको गाउँपालिका स्तरीय वार्षिक परीक्षा सञ्चालन तथा व्यवस्थापन सम्बन्धमा प्रधानाध्यापकहरूसँग छलफल सम्पन्न गरीएको छ । छलफलबाट परीक्षा मिति, परीक्षा केन्द्र तथा अन्य व्यवस्थापन सम्बन्धी महत्वपूर्ण निर्णयहरू गरिएको  छ।

वार्षिक परीक्षा फागुन २६ गतेदेखि चैत ५ गतेसम्म सञ्चालन गरिने भएको छ। कक्षा ८ का परीक्षाको लागि विभिन्न परीक्षा केन्द्र तोकिएको छ। वडा नं. १ का विद्यार्थीहरूका लागि हिमालय माध्यमिक विद्यालय, पाखापानी, वडा नं. २ का लागि हिमालय माध्यमिक विद्यालय नायगाड, वडा नं. ३ का लागि जनता माध्यमिक विद्यालय पोखरा, वडा नं. ४ का लागि जनप्रिय माध्यमिक विद्यालय दादिङ्ग, वडा नं. ५ का लागि रुक्मिणी माध्यमिक विद्यालय रुकुमकोट, वडा नं. ६ का लागि त्रिभुवन जनता माध्यमिक विद्यालय छिप्रिदह, वडा नं. ७ का विद्यार्थीहरूका लागि वडा नं. ८ मा रहेको सानोभेरी माध्यमिक विद्यालय, लम्पाकोट; तथा वडा नं. ८ का लागि आधारभूत विद्यालय, स्यालापाखालाई परीक्षा केन्द्र तोकिएको छ।

कक्षा ५ को परीक्षा भने वडा समितिको व्यवस्थापनमा प्रत्येक वडाको पायक पर्ने विद्यालयमा सञ्चालन गरिनेछ। उत्तरपुस्तिका परीक्षण गरी नतिजा प्रकाशन गरिने व्यवस्था मिलाइनेछ। परीक्षा निष्पक्ष र व्यवस्थित बनाउन कक्षा ८ को परीक्षा केन्द्रमा वडान्तर निरीक्षक खटाइने शिक्षा, युवा तथा खेलकुद शाखा प्रमुख मंगलसिह बुढाले जानकारी दिए ।

प्रश्नपत्र निर्माणको जिम्मेवारी गाउँपालिका परीक्षा व्यवस्थापन तथा सञ्चालन समितिलाई दिइनेछ। समितिले आवश्यक छलफल गरी प्रश्नपत्र निर्माण गर्ने, सिस्ने गाउँपालिकाले यो निर्णयमार्फत वार्षिक परीक्षालाई व्यवस्थित, पारदर्शी र प्रभावकारी बनाउने प्रयास गरेको छ। अबका दिनहरूमा परीक्षा तयारीलाई थप सशक्त बनाउन आवश्यक प्रक्रिया अगाडि बढाइने छ।