रुकुम पश्चिम  । रुकुम पश्चिममा जेठ १३ गते देखि २६ गते सम्म पोलियो विरुद्धको खोप अभियान सुरु हुने भएको छ । आज जिल्ला सदरमुकाम खंलगामा बसेको आईपिभि खोप अभियान– २०८१, जिल्ला स्तरिय खोप समन्वय समिति र पत्रकारहरुको बैठकले खोप अभियानको बारेमा छलफल गरेको हो ।

खोप अभियान अन्तरगत जिल्लाभर २ सय ९३ वटा खोप केन्द्रबाट १० हजार १ सय ६९ जनालाई खोप दिइने स्वास्थ्य सेवा कार्यालयका सुचना अधिकारी तथा जनस्वास्थ्य निरिक्षक कालिबहादुर ओलीले जानकारी दिए । बाँफिकोट गाउँपालिका ४३, मुसीकोट नगरपालिकामा ६७, चौरजहारी नगरपालिकामा ५२ वटा खोप केन्द्रबाट खोप लगाइने छ ।

त्यस्तै सानीभेरी गाउँपालिकामा ४७ वटा, त्रिवेणी गाउँपालिमा ३७ र आठविसकोट नगरपालिकामा ४७ वटा गरेर २ सय ९३ वटा खोप केन्द्रबाट खोप लगाइने जनस्वास्थ्य निरिक्षक ओलीले जानकारी दिए । २०७३ साल बैशाख महिना देखि २०७५ साल असोज महिना सम्म जन्मिएका बालबालिकालाई खोप अभियानमा सहभागि गराइने छ ।

यो पटक खोप पाउने बालवालिकाहरु विद्यालयबाट छनोट गरिएको हो । बाँफिकोट गाउँपालिकामा १ हजार ३ सय १८ जनाले, मुसीकोट नगरपालिकामा २ हजार ३ सय ३७, चौरजहारी नगरपालिकामा १ हजार ९ सय ६० जनाले, सानीभेरी गाउँपालिकामा १ हजार ४ सय ३९ जनाले, त्रिवेणी गाउँपालिकामा १ हजार ७१ जना र आठविसकोट नगरपालिकामा २ हजार ४४ जना बालबालिकाले पोलियो विरुद्धको खोप पाउने छन् ।

अभियानमा २ सय ७८ खोप कार्यक्रता र ३ सय ९८ जना स्वयमसेवक खटिने स्वास्थ्य सेवा कार्यालयले जनाएको छ । खोप लगाए पछि देखिने स्वास्थ्य समस्याको समधान गर्नको लागि जिल्ला अस्पताल र पालिकाहरुमा रहेका अस्पतालमा रहेका स्वास्थ्यकर्मीहरु परिचालन गरिने बताईएको छ ।।