रुकुम पश्चिम  । जिल्लाको आठबिसकोट नगरपालिकाले विद्यालयहरु बन्द गर्ने भएको छ । गर्मी बढेसंगै विद्यार्थीमा स्वास्थ्य समस्या देखिन थाले पछि विद्यालयहरु बन्द हुनभे भएको हुन् ।

गर्मीका कारण केही दिन यता विद्यार्थीहरू एक्कासि बेहोस हुने, छट्पटाउने लक्षण देखापरेपछि नगरपालिकाले सबै सामुदायिक विद्यालयहरू बन्द गर्ने निर्णय गरेको हो । आठविसकोट नगरपालिकाका निमित्त प्रमुख प्रशासकीय अधिकृत मणिराज शाहका अनुसार भोली असार ५ देखि ९ गतेसम्मका लागि पठनपाठन स्थगन गर्ने निर्णय भएको हो ।

नगर प्रमुख रबी केसीको अध्यक्षतामा बसेको आकस्मिक बैठकले पाँच दिन पठनपाठन स्थगन गर्ने निर्णय गरेको हो । मीन पचास बिदाबाट बिदा कट्टी हुनेगरी नियमित पठनपाठन स्थगित गरिएको निमित्त प्रमुख प्रशासकीय अधिकृत शाहले जानकारी दिए ।

अत्यधिक गर्मीको कारण विद्यार्थीहरू बिरामी भएको विद्यालयले जानकारी दिएका छन् । नगरपालिकाका शिक्षा अधिकृत इन्द्रबहादुर विष्टका अनुसार केही दिन यता वडा नम्बर १० मा रहेको जनता माध्यमिक विद्यालय झिन्चौरका ८–१० जना विद्यार्थीहरूमा विद्यालयमै एक्कासि बेहोस हुने, छट्पटाउने समस्या देखिएको थियो । त्यसैगरी वडा नम्बर ११ मा रहेको नेपाल राष्ट्रिय माध्यमिक विद्यालयका विद्यार्थीहरू बिरामी हुन थालेका थिए ।

विद्यार्थीहरू बिरामी हुने क्रम नरोकिएपछि र बिरामी हुने दर बढ्न थालेपछि आकस्मिक बैठक बसेर नियमित पठनपाठन स्थगित गरिएको हो ।