रुकुम । रुकुम पश्चिमको मुसिकोट नगरपालिकामा तेस्रो राष्ट्रपति रनिङ शिल्ड सुरु भएको छ । मुसिकोट १ खंलगामा शिल्डको सोमबार प्रमुख अतिथि नगरप्रमुख महेन्द्र केसीले उद्घाटन गरेका हुन् ।

शिल्डमा नगरपालिका भित्रका १६ वटा सामुदायिक र ३ वटा संस्थागत विद्यालय गरी १९ वटा माध्यामिक विद्यालयका विद्यार्थीको सहभागिता रहेको रनिङ शिल्ड व्यवस्थापन तथा सञ्चालन उपसमिति संयोजक तथा बालकल्याण मावि सोलावाङका प्रधानाध्यापक भक्तबहादुर खड्काले जानकारी दिए ।

उहाँका अनुसार शिल्डको उद्घाटन खलंगामा गरिएको र खेलकुदका कार्यक्रमहरु भने मंगलबारबाट नगरपालिकाको वडा नम्बर ४, ६ र ११ को सिमानामा पर्ने ट्याखोला सञ्चालन हुने छन् । १ गते सुरु हुने भनिएको शिल्ड केही कारणले ढिला गरी आजबाट सुरु भएको हो । शिल्डमा छात्र, छात्रा भलिवल, छात्र, छात्रा, हाईजम्प, लङजम्प, त्रिपलजम्प, ज्याभलिङथ्रो, सटफुट प्रतियोगिता सञ्चालन हुनेछन् ।

त्यस्तै दौड तर्फ १ सय मिटर, २ सय मिटर, ४ सय मिटर, ८ सय मिटर, १५ सय मिटर र ३ हजार मिटरको छात्र, छात्र दौड प्रतियोगिता हुनेछ । मार्शल आर्टतर्फ कराते, तेक्वान्दो प्रतियोगिता आयोजना गरिएको छ । शिल्डमा भलिवल प्रतियोगिता र मार्शल आर्टतर्फ कराते र तेक्वान्दोमा सहभागि जनाएका विद्यार्थीले अन्य कुनै पनि विधामा सहभागि हुन नपाउने उपसमिति संयोजक खड्काले जानकारी दिए । शिल्ड ६ गतेसम्म सञ्चालन हुनेछ ।