रुकुम पश्चिम । रुकुम पश्चिममा वन डढेलो नियन्त्रण संयुक्त अभ्यास कार्यक्रम सम्पन्न भएको छ । जिल्ला वन सुरक्षा समन्वय समितिको आयोजना तथा डिभिजन वन कार्यालय रुकुम (पश्चिम)को समन्वयमा वन डढेलो नियन्त्रण संयुक्त अभ्यास कार्यक्रम सम्पन्न भएको हो ।

अभ्यास कार्यक्रममा चण्डिदल गण, सशस्त्र प्रहरी बल नेपाल ४७ नं. गुल्म, जिल्ला प्रहरी कार्यालय रुकुम (पश्चिम), मुसिकोट नगर प्रहरी र डिभिजन वन कार्यालयका कर्मचारी समेत गरी जम्मा ७० जनाको सहभागिता रहेको थियो । वन डढेलो नियन्त्रण सम्बन्धमा सैद्धान्तिक कक्षा र भाडगारे संगम सामुदायिक वन उपभोक्ता समुहमा स्थलगत अभ्यास पनि गरिएको डिभिजन बन कार्यालय रुकुम पश्चिमका प्रमुख शेरबहादुर परियारले जानकारी दिए ।

हिउँद लागेसंगै रुकुम पश्चिममा वनमा डढेलोको घटना हुने गर्छन । प्रत्यक बर्ष जिल्लामा वनमा आगो लगाउने घटनामा वृद्धि हुदै आएको छ । हिउँदे बर्षा नहुनु, समुदायमा सचेतनाको कमि, नयाँ घास पलाउने भन्ने विस्वासले जंगलमा आगो लगाउने गरेको कार्यालय प्रमुख परियारको भनाइ छ ।

प्रमुख जिल्ला अधिकारी कुलबहादुर जिसीको अध्यक्षतामा भएको कार्यक्रममा जिल्ला समन्वय समिति कार्यवाहक प्रमुख देवबहादुर विकको प्रमुख आतिथ्यता रहेको थियो ।।